Numbers 4
A Kabu ne Kohat
1E BAKOVI DAGI i taki e Moses e Aron, i ta maea, 2“Muru here a rane huriki a bakovi na tara ne Kohat, na kabu ne Levi. 3Muru here a rane huriki a bakovi ri tahoka a pida i ravulu tolu, i harena na pida i ravulu lima, re huriki a bakovi ri kara ni rata a leho pololilo na Kape na Vaponga.4“A leho ne ria ne vona ni matakari a Kape na Vaponga, a maka maki ni taba hateka. 5Na tahuna e huriki a Israel ri gi pea a mada ni lakea na tabeke tara, e Aron turane huriki e tuna bakovi ri gi dili na Kape na Vaponga, ri gi parua a kala dagi i naviri dili a Tava na Ngava Dagi, ri gi kavitagua a tava na kala iea. 6Ri gi naviri purua a kala na kulina lui kamumu, ri gi ru polomelia a kala gomagoma ne vona ni kavitagu loboa, bara ri rodo polo na halui a binole i rua, ri kalohoa.
7“Ri gi bole a kala gomagoma, ri gi kavitagua a dede ni ru langa a bret vona, ge a nihabi ne BAKOVI DAGI. Ri gi bole a pelete, a tavila na havu mangisipa, ▼ a maka pelete na maka nihabi ranga, a maka botol ne vona a nihabi na vain, a bret ni vakasiri vakaroro ni gi ru langa palupu lobo na kala gomagoma. 8Ri gi kavitagu lobo na kala vururu a maka maki nga, ri gi bole a kulina lui ri gi kavitagua a kala vururu, ri gi rodo dili na halui a binole ge rua.
9“Ri gi bolea a kala gomagoma, ri gi kavitagua a butuna lam, a maki ni kisi a vik vona, a pelete kiroko ne vona ni tahoni a habulo na kanono, a maka botol na vel. 10Ri gi kavitagua ra kala gomagoma iea na kulina lui, ri gi ru langa na maki tara bara ni kaloho.
11“Muri ri gi kavitagua na kala gomagoma a dede ni rata na gol, ri gi kavitagua ra kala iea na kulina lui, ri gi rodo dili na halui a binole. 12Muri ri gi bolea a kala gomagoma, ri gi bunu a maka tavila ni rata a leho ne ria na Tabeke Nitaba. Muri ri gi bunu kari tabua na kulina lui, ri gi ru langa na binole, bara ri kaloho.
13“Ri gi bole tala na dede a habulo, ri gi kavitagua na kala kuakua a dede. 14Ri gi bole lobo a maka maki ni rata a leho ne ria vona na dede: a maka tavila ni guru a habulo, a maka kinau, a maka savol kiroko, a maka pelete kiroko ne vona ni bole a dara na nihabi. Ri gi ru langa na dede a maka maki, muri ri gi kavitagu na kulina lui, ri gi rodo dili na halui a binole ge rua, bara ri kaloho.
15“Na tahuna e Aron, e tuna mai ri kavitagu lobo a maki i taba, muri e huriki e tune Kohat bara ri kaloho a maka mahala na kape, pali nahea ri gi padoi a maka maki nga. Ria bara ri padoi, bara ri mate. Na tahuna ri pe a mada, e Aron turane huriki e tuna, ri gi kavitagu kamumu a maka maki nga. Ra maki nga, e huriki e tune Kohat kunana ri kaloho.
16“E Eleasar, e tune Aron a prister, ge matakari a kape, a vel na lam, a namona oliv ne vona ni gamai e huriki a prister, a havu mangisipa, a maka nihabi na vit, a nibiri, turana a maka maki nau ri tabuli na kape.”
17E BAKOVI DAGI i taki e Moses e Aron, i ta maea, 18“Na tahuna e huriki a Kohat ri valai tabukoi na maki nau, mu matadoko ne ria, ma ri gi ratea tara naro hale, ga rabalaki ria. I mavonga kunana, e Aron turane huriki e tuna, ri gi dili muga taro, ri gi ru a leho na bakovi takutaku na kabu ne Kohat. Ri gi taki ria vona a ra maki ri gi kaloho. 20Pali e huriki a Kohat, nahea ri gi dili na kape, ri gi matai a maka maki ni taba, ma ga rabalaki ria.”
A Leho na Kabu ne Gerson
21E BAKOVI DAGI i takia e Moses i ta maea, 22“O gi e huriki a bakovi na tara ne Gerson, re huriki a hamone Levi. 23O here puru a rane huriki ri tahoka a pida i 30, i harena na pida i 50, re huriki ri kara ni rata a leho pololilo na Kape na Vaponga. 24Ri tahoka a leho ni kaloho a maka maki nga: 25a kadis, a kala i kavitagua, a kulina lui i kavitagu a kala, a kala dagi na mataroho, 26a maka mota, a maka kala ne vona ni kapi halui a nure na kape, a dede, a kala dagi na mataroho na nure, a maka maki kiroko ne vona ni vakatora a kape, a nure. A kabu ne Gerson i tahoka a leho ni kaloho kamumu a maka maki nga. 27E Aron, turane huriki e tuna bakovi, ri gi matakari e huriki a Gerson, ri gi vakasiri ria vona a maki ri gi kaloho. 28E huriki a Gerson ri gi rata a maka leho nga na kape. E Itmar, e tune Aron a prister, ge matakari ria.A Leho na Kabu ne Merari
29“Na kabu ne Merari, o here puru ge ramai e huriki a gare ne ria a rane ria. 30O here puru a rane huriki a bakovi ri tahoka a pida ne ria i 30, i harena ne 50, re huriki ri kara ni rata a leho pololilo na Kape na Vaponga. 31Ri tahoka a leho ni kaloho a butu na kape, a maka kai ne vona ni vakatora a nure, a maka vuhubutu ne vona ni vakapesi a butu, 32a maka butu na nure, a maka vuhubutu ni vakapesi langa a maka butu na nure vona, a maka mota ne vona ni vakatora a nure, a maka maki ranga na nure. O taki a bakovi takutaku a ra maki ge kaloho. 33E huriki a Merari ri gi rata a maka leho nga na Kape na Vaponga. E Itamar, e tune Aron a prister, ge matakari ria.”34Lakea e Moses, e Aron, turane huriki a nupesi, ri here puru a rane huriki na kabu ne Kohat i ramai a rane huriki a kabu ne ria. 35A pida ne ria i ravulu tolu, i harena ne ravulu lima. Re huriki ri kara ni rata a leho pololilo na Kape na Vaponga. 36E huriki ni here a rane ria, ri ala 2,750. 37E Moses, e Aron ru here a rane huriki na kabu ne Kohat ri gi leho na roho na vaponga, i ramai a nitane BAKOVI DAGI i vakuku e Moses vona.
38A Kabu ne Gerson, ngi ranga ni here muri mai a rana nupesi ne ria, a rane ria. 39A pida ne ria i ravulu tolu, i harena ne ravulu lima, ri kara ni leho na roho na vaponga. 40Ni gi palupu ria, ri ala 2,630. 41Re huriki nga, a rane huriki na kabu ne Gerson, ri leho na roho na vaponga, i ramaia a ngava ne BAKOVI DAGI.
42E huriki a Merari, ngi ranga, ni gi ramai a vuhune ria na kabu takutaku ne ria. 43A bakovi ri tahoka a pida i ravulu tolu, i harena na pida i ravulu lima, ri valai, ri leho na roho na vaponga. 44Ni gi ramai a kabu ne ria, ri ala 3,200. 45Re huriki nga a hamone Merari, e BAKOVI DAGI i vakuku e Moses, e Aron vona ru gu gi.
46Lakea e Moses, e Aron, turana e huriki a nupesi ne Israel, ri gi e huriki a hamone Levi i ramai a kabu takutaku ne ria. 47A bakovi a pida ne ria i ravulu tolu, i harena na pida i ravulu lima, ri valai, ri rata a leho ni kaloho a maka mahalana kape, 48Ni gi palupu lobo ria, ri ala 8,580. 49Ri ramai a nitane BAKOVI DAGI i vakuku e Moses vona, ri here puru lobo a rane huriki na kabu ne Levi. Ri gi rata a leho, ri gi kaloho a maka mahalana kape.
Copyright information for
BNP